විචාරකගේ අඩවිය – සමගාමී බ්ලොගර් අඩවියේ ලිපිනය – wicharaka.blogspot.com


Seasaw Trap   උගුල් ඇටවීම, ප්‍රාග් ඓතිහාසික යුගයේ ජීවත්වුණු මානවයා විසින් පවා කළ දෙයක් නේද? රැකියා නොකළ ඔවුන්, තම ජීවිතය රැකගත්තේ, උගුල් අටවා සතුන් අල්ලාගෙන ආහාරයට ගැනීමෙන්. නමුත් උගුල් ඇටවීම අද සමාජයේත් දෙයාකාරයකින් සිදුවෙනවා. එක් ආකාරයක් තමයි, වන සතුන් අල්ලාගැනීම සඳහා උගුල් ඇටවීම. මෙය අදත් වනසතුන් ගහණ ප්‍රදේශවල සිදුවෙනවා. අනෙක් ක්‍රමය තමයි, අද සමාජයේ තිබෙන විවිධ කපටි කෛරාටික උපක්‍රම මගින්, අහිංසක මිනිසුන් රවටා, ආර්ථික වාසි, සහ/හෝ වෙනයම් පෞද්ගලික වාසි ලබාගැනීම. ‘උගුල් අටවනවා’ යන යෙදුම අද සමාජයේ බහුලව යෙදෙන්නෙත්, එවැනි ආකාරයේ අසාධාරණ ක්‍රියා හැඳින්වීමටයි. මේ ටික මුලින්ම කිව්වේ, මම අහුවුණ උගුලක් ගැන ඔබ දැණුවත් කිරීමට සහ ඔබ ඒ උගුලට අසුවීමෙන් වලක්වා ගන්නටයි. මා මෙම උගුලට අහුවුණේ 2011 වර්ෂයේදී.

   (මක්කිව්වා…..? නෑ නෑ, ඒ උගුලට අහුවුණේ 1981 දි. අම්මෝ අද වෙනකල් ඒ උගුලේ සැපෙන් සනීපෙන් ඉන්නවා)

   මේ කියන උගුල අටවන්නේ, ශ්‍රී ලංකා ටෙලිකොම් ආයතනයෙන්. උගුල ගැස්සෙන්නේ ශ්‍රී ලංකා රක්ෂණ සමාගමෙන්. මෙන්න මෙහෙමයි කතන්දරේ.

   2011 වර්ෂයේ මැද භාගයේ එක දවසක, මම ගෙදර සිටින අවස්ථාවක, මගේ නිවසේ දුරකථනයට ඇමතුමක් ලැබුණා, ශ්‍රී ලංකා ටෙලිකොම් ආයතනයෙන්.

   ඉතා මිහිරි කටහඬකින් කතාකළ ප්‍රවර්ධන නිළධාරිණියක් මට කිව්වා, ශ්‍රී ලංකා ටෙලිකොම් පාරිභෝගිකයන් වන, රජයේ විශ්‍රාමිකයන් සඳහා, රක්ෂණ යෝජනා ක්‍රමයක් ආරම්භ කර ඇති බවත්, හදිසි අනතුරකදී හෝ මරණයේදී, රුපියල් ලක්ෂයක රක්ෂණ ආවරණයක් ලැබෙන බවත්, ඒ සඳහා මාසික දායකත්වය රුපියල් 60 ක් බවත්. ඔන්න ඉතින් අපි වගේ විශ්‍රාමිකයන්ට, එක වරම ඉහේ මල් දාහක් පිපෙන්නේ, ඔන්න අයවගේ ආරංචි ආවම.

   ඉතිරිකරගත් මහා ධනයක් නැති, බැංකුවේ උගස් කළ රත්තරන් බඩු වලට තවමත් පොළී ගෙවන, දෑවැද්ද හොයා බන්දලා දෙන්න දූවරු ඉන්න, අපි වගේ අයට, මේ වගේ ආරංචි, කණේ මීපැණි වක්කරනවා වගේ නේ. ඔන්න මමත්, තනි අණ්ඩෙන් හෙවත් එක පයින්, වැඩේට කැමති වුණා. ඔන්න ඉතින් එදා ඉඳලා අද දක්වා, ඔය රුපියල් 60, මගේ මාසික දුරකථන බිලෙන් කපාගන්නවා. නමුත් ඒ සඳහා වෙනම ලදුපතක් ලැබෙන්නේ නැහැ. මගේ ළඟ තියනවා සියළුම දුරකථන බිල්පත් එකතු කරලා. ඒ නිසා ඒ ගැන නීතිමය කරුණකදී වුණත්, ඒවා ඉදිරිපත් කරන්න පුළුවන්.

   නමුත් මාව කරකවලා අතෑරියා වගේ වැඩක් වුණේ, මේ ඊයේ පෙරේදා, ශ්‍රී ලංකා රක්ෂණ සමාගමෙන් ලැබුණ ලිපියක් නිසයි. ඒ ලිපියේ තියෙන්නේ, ජීවිත රක්ෂණ සහතිකය බව දක්වා තිබෙන අතර, ඒ සඳහා අදාළ නීති සහ කොන්දේසි ද, දක්වා තිබෙනවා. මෙන්න මෙහෙමයි තියෙන්නේ. රූපය මත ක්ලික් කර විශාලනය කර බලන්න. 

Scan_20150508_000250

   2011 දී බැඳුන රක්ෂණ යෝජනා ක්‍රමයට, දැන් මේ 2015 දී තමයි කොන්දේසි එවන්නේ. ඊටත් වඩා, ඒ කොන්දේසි ඇඟ හිරිවැටෙන එව්වා. මේ කොන්දේසි අතරේ තියනවා, පුදුම සහගත සහ හාස්‍යජනක හෙවත්, නොමිළේ විහිලු සපයන කොන්දේසිත්. මෙන්න එව්වා.

  • අංක 2 යටතේ කියනවා, මෙම ගිවිසුම ඇතිවන්නේ ටෙලිකොම් සහ රක්ෂණ සමාගම අතරෙලු. එතකොට අපි රක්ෂණ ගිවිසුමකට බැඳිලා නැද්ද?
  • අංක 6 යටතේ කියනවා, සාමාජිකයාට අවයස අවුරුදු 70 පිරුණු පසු ප්‍රතිලාභ අත්හිටවවාලු. මොකක්ද ඒකෙ තේරුම? ඒ කියන්නේ වයස අවුරුදු 70 ට පස්සේ, අපි මැරුණත් රක්ෂණ මුදල් ගෙවන්නේ නැහැ කියන එකයි. මේ ගැන කරුණු විමසුවාම ශ්‍රී ලංකා ටෙලිකොම් සහ රක්ෂණ සමාගම එය සනාථ කළා. රක්ෂණ වන්දියක් ලබාගැනීමට නම්, මීට වඩා වැඩි වාරික මුදලක් අයකරන යෝජනා ක්‍රමයකට බැඳෙන්නලු. අනේ අනේ නන්නානේ. එහෙනම් ඒක කලින් කියන්න තිබුනනේ මේ උගුලට අපිව අල්ලගන්නේ නැතුව.
  • අංක 9 යටතේ කියනවා, රක්ෂණ ඔප්පුවට ඇතුළත් වනවිට රක්ෂිතයා මනා සෞඛ්‍ය තත්වයෙන් නොසිටි බව හෙළිවුණොත්, රක්ෂණ මුදල් ගෙවන්නේ නැහැ කියලා. ඉතින් මේ රක්ෂණ යෝජනා ක්‍රමයට ඇතුළුවනවිට අපිට වෛද්‍ය පරීක්ෂණයක් තිබ්බේ නැහැනේ. දැන් කොහොමද කියන්නේ එදා අපි නීරෝගීව හිටියද නැද්ද කියලා?
  • අංක 10 නම්, අපි වගේ හමුදා සාමාජිකයන්ට බොහොම හුරු පුරුදු දෙයක්. ඒ කියන්නේ, යුද්ධ, කැරළි, කළකෝලාහල, නිසා මියයාම වෙනුවෙන්, රක්ෂණාවරණ ගෙවන්නේ නැහැ කියන එක. පහුගිය යුද්ධ කාලේ, ඔය මහා රක්ෂණ සමාගම්, එක හඬින් ප්‍රතික්ෂේප කළා, ආරක්ෂක හමුදා සාමාජිකයන්ට ජීවිත රක්ෂණ ලබාදීම. අන්තිමට, ආරක්‍ෂක අමාත්‍යාංශයෙන් විශේෂ වැඩපිළිවෙලක් යොදන්න වුණා, ආරක්‍ෂක හමුදා සාමාජිකයන් වෙනුවෙන්. අද යුද්ධයක් නැතත්, මේගොල්ලන්ගේ ප්‍රතිපත්තිය වෙනස්වෙලා නැහැ. කැරැල්ලකට සම්බන්ධ නැති, පාරේ ගිය අහිංසක මිනිහෙක්, කැරැල්ලේ අනියම් බලපෑමකින් මියගියත්, ඔහු මේ රක්ෂණ ක්‍රමයේ සාමාජිකයකු වුණාට, රක්ෂණය ලැබෙන්නේ නැහැ, මේ ප්‍රතිපත්තිය අනුව. හරි ෂෝක් නේද?
  • අංක 12 හෙවත්, මෝඩයකු විසින් කර තිබෙන, රට විහිලුව. මේ කාරණයේදී කියන්නේ, මෙම රක්ෂණයට බැඳී සිටින සාමාජිකයකු, මෙම ඔප්පුව වලංගුව පවතින කාලය තුළ, හිමිකමක් ඉල්ලීමට පෙර හෝ පසුව හෝ, හිමිකමක් ගෙවමින් සිටියදී හෝ, HIV ඒඩ්ස් ආසාදිතයකු බව දැනගතහොත්, ගෙවීම් අත්හිටවනවාලු. අනේ අම්මපා මුන්දෑලාගේ සාමාන්‍ය දැනුම මෙච්චර පහළද තියෙන්නේ? යම්කිසි පුද්ගලයකු, ඔහුට වළක්වාගත නොහැකි තත්වයන් යටතේ, HIV ඒඩ්ස් ආසාදිතයකු බවට පත්වියහැකි බව, ඉස්කෝලේ ළමයිනුත් දන්නවා වුණාට, මේ රක්ෂණ ඔස්තාර් අබබ්බයන් දන්නේ නැත.

       ‘ඉතින් මොකේදැයි දන් වළඳන්නේ’ කිව්වලු. මේ විදිහටම මේ ටෙලිකොම් උගුලට අහුවුණ කීදෙනෙක්, මේ රටේ ඇද්ද? ඔවුන්ටත් අත්වන්නේ, අද මට අත්වී ඇති ඉරණමම නොවේද? අපිව මේ විදිහට ගසාකන්නේ ඇයි? නිකමට හිතන්න විශ්‍රාමිකයන් 1000ක් මෙයට බැඳුනා කියා. එක මසකට රුපියල් 60000 ක් අයකර ගන්නවා. වසරකට රු 720000 ක් එකතුවෙනවා. විශ්‍රාමිකයාට අවුරුදු 70 පිරුණම, ඒ මුදල් රක්ෂණ සමාගමට අයිති වෙනවා. හොඳයි නේද?  

   අපේ ජනාධිපතිතුමාගේ සහෝදර තුමා වන කුමාරසිංහ සිරිසේන තුමෝ. ඔබතුමා නේද ශ්‍රී ලංකා ටෙලිකොම් සභාපති. අනේ තුමෝ, මේ දවස්වල ඔබතුමාට මැතිවරණ උන සෑදී නැත්නම්, මේ ගැන පොඩ්ඩක් බලනවා හොඳයි. 

   මට මේ උගුල පෙනෙන හැටි, පහත දැක්වෙන රූපයෙන් බලන්න. 

The Trap

2015 මැයි මස 10 වැනි දින 0932 පැය 

Advertisements

Comments on: "මේ උගුලට අහුවෙන්න එපා!" (17)

  1. අපෝ ටෙලිකොම් එක ගැන නම් කියල වැඩක් නෑ.බිල් එනවනෙ කතා කොකර හිටියත්
    ……….

  2. හොඳයි දැනුවත් කල එක. මටත් කාලයක් ටෙලිකොම් ලෑන්ඩ් ලයින් එකක් තියාගෙන ඒකෙන් ටීවී සහ අන්තර්ජාලගත වෙලා පාවිච්චි නොකරත් බිල් එවලා තිබුනා. එහෙම වෙන්නේ මම රටෙන් පිටවෙන්න කලින් ලයි එක විසන්ධිකරන්න කියලා ලියුම් දීලත්. ඕක අවුරුදු දෙක තුනක් සිද්ධ වුනාට පස්සෙ මම ගිණුමම ඩිලීට් කරලා දැම්මා.

    • අපොයි මොනවා නැතත් ඒගොල්ලෝ බිල් එවන්න නම් බොහොම දක්ෂයි.

      • ක්සැන්ඩර් said:

        මොන පිස්සුද විචාරක තුමා. මෙයාල මට අවුරුදු තුනක් ෆ්‍රී ඉන්ටර්නෙට් දුන්නනේ බිල එවන්නේ නැතුව.. පස්සේ තමයි එකපාර බිල් එව්වේ.. මම කිව්වා මට ගෙවන්න බෑ කියල.

        • මට ඔය වැඩේ වෙන්න ගියා. මාස තුනක් ගියාම මම ගිහින් බලෙන්ම බිල ඉල්ලගත්තා. එකවර මාස තුනක බිල ගෙවන්න වුනා.

  3. ඔතන එයාලා දෙන්නේ දාලා තියෙන ඒවා අනුව නම් ජීවිත රක්ෂණයක් නෙවෙයි අනතුරු ආවරණ රක්ෂණයක්.එතනදි අපි ගෙවපු මුදල් ආපහු ගන්න බෑ.ඒත් අනතුරක් වුනොත් ගෙවන්න ඕනේ.කොහොමහරි වෙලා තියෙන්නේ නම් උගුලක්.හරියට අර රින්ගින් ටෝන් වගේ.

    • කියන මගුලක් මුලදීම පැහැදිලිව කියන්නේ නැතුව අපිව වටේ ඇරිය එක තමා මෙයාලා කරපු ලොකුම බොරුව. රාජ්‍ය ආයතනයක් මේ වගේ කපටිකම් කිරීම නින්දිතයි.

  4. මං මේ මෙච්චර ගේමක් දෙනවනෙ උගුලෙ අහුවෙන්න… ලූප්ස් නෑලු.

    • දැන්නම් හුඟක් පැතිවල අලුත් සම්බන්ධතා පහසුවෙන් දෙනවා. ලූප්ස් නැත්නම් කොන්ඩොම් හරි දාලා දෙන්න කියන්න. 😀

    • ඩ්‍රැකියො හැකි නම් අන්තර්ජාල සබඳතාවක් එක්ක ඉල්ලලා බලන්න…මම අපේ ගෙදරට ගත්තෙ එහෙමයි…එහෙම ඉල්ලුවාම ප්‍රමුඛතාව දෙනවා…ප්‍රධාන මාර්ගයකින් අතුරු මාරගයක තියෙන අපේ නිවසටත් ඔය ලූප්ස් ගැටලුව බලපෑවා. එක ලූප් එකක් තිබුනා කාගෙද ෆෝන් එකක් කපපු එකක්…ඒක ගන්න මා එක්ක තව ගොඩාක් උන් පොර කෑවා…ටොලිකොම් ඇතුලෙන් අදාල නිලධාරියෙකුට…විස්කි බෝතලයකුත් මම ඉතිං සම්තින් විදියට දීලා වැඩේ ගොඩ දාගත්තෙ.

      • කිව්වට් වගේ හැබෑටම මෙගා ලයින් එකක් නෙවේද ඉල්ලුවේ?

        පාගා මරුවෝ ඉන්නේ සිරෝ සමහර එවුන්. මම දවසක් හැමැන්නුවා ටෙලිකොම් ඔෆිස් එකටම ගිහින්. මගේ ටෙලිපෝන් ලයින් එකේ කම්බි දිරලා, ඉන්ටර්නෙට් ස්ලෝ වෙලා තියෙන්නේ කියලා, කොච්චර කිව්වත් හැදුවේ නැති නිසා. බැන්නට පස්සේ තමයි ඇවිත් හැදුවේ.

  5. කුමාරසිංහ සිරිසේනගෙ ජාතකේ අපූරුවට වනලා තියෙනවා ලංකා ඊ නිව්ස්…පහල කොටස උපුටා ගත්තෙ එතැනින්…මේක අරුම පුදුම කොන්දේසි සහිත එකක් බව පේනවා..අද කාලෙ අලුත්ම ක්‍රමය තමයි පොඩි ගානක් බැගින් මහා පිරිසකින් වංචා කිරීම…ගාන පොඩි නිසා ඕනෙම කෙනෙක් දෙපාරක් නොහිතා මේකට දායක වෙනවා. මමත් ලංකාවෙදි සිංගා ජොබ් එකකට ඇප්ලිකේෂන් දැම්මා…ඒවා යවන්න යන රු 2500 විතරයි මගෙන් අය කලේ…නමුත් කිසි දෙයක් උනේ නෑ….පස්සෙ කාලෙක මම සිංගප්පූරුවට ඇවිත් හොයලා බැලුවාම ඒ විදියට කවදාවත් එහෙ රැකියාවක් ගන්න බෑ. අර මිනිහා 2500 ඒවායින් තමයි වංචාව කරන්නෙ. ලක්ෂ ගානක් නොවන නිසා ඕනෙ කෙනෙක් සම්බන්ධ වෙනවා. උපුටා ගත්ත ටික මෙහෙමයි….

    // ටෙලිකොම් සභාපති ජනාධිපති සොයුරු කුමාරසිංහ සිරිසේන තමන්ගේ කූඨ ජාවාරම් සහ ජාවාරම් න්‍යායාචාර්යවරුන් රැක ගැනීම වෙනුවෙන් ටෙලිකොම් සමාගමට බිලියන ගණනක පාඩු සිදුවන්නට ඉඩ හැර තිබෙන පුවතක් ලංකා ඊ නිව්ස් අභ්‍යන්තර තොරතුරු සේවය වෙත වාර්තා වේ.

    රාජපක්ෂ රෙජීමය සමග ගස් කපමින් සිටි කුමාරසිංහ සිරිසේන, අයියා ජනාධිපති වනවාත් සමග පැමිණ ටෙලිකොම් සභාපති ධූරයත් මොබිටෙල් සභාපති ධූරයත් ඩැහැ ගත් නමුත් සන්නිවේදනය වැනි දියුණු ව්‍යාපාරයක් මෙහෙයැවීමේ කිසිදු හැකියාවක් දැනුමක් තිබුනේ නැත. ටෙලිකොම් මොබිටෙල් සභාපති වීමට පෙර දුරකථනයකින් ඇමැතුමක් ගැනීම හැර ඒ හා සම්බන්ධ මෙලෝකේ දානයක් ගස් කපමින් සිටි කුමාරසිංහ දැන සිටියේ ද නැත. හොරෙන් ගස් කැපීමට අවශ්‍ය චේන්සෝ ආදිය ගැන දැන ගැනීමට වුවමනාවක් තිබුනා මිස නවීන සන්නිවේදන තාක්ෂනය ගැන දැන ගැනීමට මේ හාදයාට අවශ්‍යතාවක් තිබුනේ ද නැත. //

    • කියලා වැඩක් නැහැ සිරෝ. වංචාව දූෂණය කාලයක් තිස්සේ රටක බින්න බැස්සම ඒක සාමාන්‍යකරණය වෙනවා. මෙතනත් වෙලා තියෙන්නේ ඒකයි. අර උපුටා දක්වලා තියන වාර්තාව මමත් කියෙව්වා. පේනවා නේද අපිට වෙන්න යන දේ. නීතිය හා සාධාරණය කාගෙන් බලාපොරොත්තු වෙන්නද කියලා හිතාගන්නවත් බැහැ.

ප්‍රතිචාරයක් ලබාදෙන්න. විවේචනය කරන්න. සංවාදයට එළඹෙන්න. යෝජනා ඉදිරිපත් කරන්න.

Fill in your details below or click an icon to log in:

WordPress.com Logo

ඔබ අදහස් දක්වන්නේ ඔබේ WordPress.com ගිණුම හරහා ය. පිට වන්න / වෙනස් කරන්න )

Twitter picture

ඔබ අදහස් දක්වන්නේ ඔබේ Twitter ගිණුම හරහා ය. පිට වන්න / වෙනස් කරන්න )

Facebook photo

ඔබ අදහස් දක්වන්නේ ඔබේ Facebook ගිණුම හරහා ය. පිට වන්න / වෙනස් කරන්න )

Google+ photo

ඔබ අදහස් දක්වන්නේ ඔබේ Google+ ගිණුම හරහා ය. පිට වන්න / වෙනස් කරන්න )

%d bloggers like this: