විචාරකගේ අඩවිය – සමගාමී බ්ලොගර් අඩවියේ ලිපිනය – wicharaka.blogspot.com


sisira_senatarhne   අසහාය ගායක සිසිර සේනාරත්න මහතාණන්ගේ අභාවය සැලවූ වහාම, තදින් වේදනාවට පත් මා හදවත, මතක මංපෙත දිගේ ආපසු ඇදීගියේ, මගේ බාල කාලයටයි. අම්මා ගැයූ නැළවිලි ගීත රසවිඳීමෙන් පසු ලාබාල කාලයේදීම සිත්ගත් කට හඬවල් අතරින් එදත් අදත් මගේ සිතට තදින්ම කා වැදී ඇති හඬක් වන්නේ සිසිර සේනාරත්න මහතාගේ සුමධුර කටහඬයි. ඔහුගේ ගායනයේ ඇති ශික්ෂණය, සුමධුර බව, ලයාන්විත බව, වචන උච්ඡාරණයේ ඇති පැහැදිළි බව, නිරුත්සාහයෙන් ගලායන තානය, ඉතා දුර්ලභ, පූර්වාත්ම පුණ්‍ය කර්ම මහිමයෙන්ම ලද, නියත විවරණයකැයි හඟිමි.

   මා ඔහුගේ මධුර ස්වරයට ඇලීගියේ, හඳපාන චිත්‍රපටියේ ගීත ඇසීමෙන් පසුව බවයි මගේ මතකය. අපේ බොහොමයක් පැරණි ගායක ගායිකාවන් මෙන්, ඔහුද, චිත්‍රපටි පසුබිම් ගීත ගායනයෙන්, ගායන ලෝකයට පිවිසි අතර, මුල් කාලයේදී, හින්දි චිත්‍රපටි තනු අනුකරණය කොට නිමැවූ ගීතද, ගායනා කරන්නට යෙදුනි. එහෙත් ක්‍රම ක්‍රමයෙන් පරිණත භාවයට පත්ව එද්දී, ස්වතන්ත්‍ර නිර්මාණ බිහිකරන්නටත්, එම නිර්මාණ සිංහල ගීත ක්ෂේත්‍රයේ අග්‍රගන්‍ය මට්ටමේ රඳවන්නටත්, ඔහුට හැකිවිය.

   ඔහුගේ ගායන දිවිය තුළ, ඔහුට අභියෝග කිසිවක් නොවීය. ඔහුට අභියෝගයක් වුයේ ඔහුගේම ස්වර්ණමය හඬ පමණි. සිසිර සේනාරත්න මහතා වැනි ගායකයන්, සිංහල ගීත ක්‍ෂේත්‍රයටම සිසිල සෙවන සපයන, මහා වස්පතීන් හා සමාන වන්නේ ඇයි. පළමුවැන්න, මුදල් සහ කීර්තිය පසුපස හඹා නොයමින්, අල්පේච්ඡතාවයෙහි රැඳී සිටිමින්, 100% ක් දේශීය නිර්මාණ බිහිකිරීමටත්, එකී නිර්මාණ, හරවත්, අර්ථවත්, සදානුස්මරණීය වටිනාකමක් ඇති නිර්මාණ ලෙස බිහිකිරීමට දිවිහිමියෙන් කළ කැපවීමත් බවයි,

   මටනම් පෙනීයන්නේ, ඔහුගේ කටහඬ, පහසුවෙන් අනුකරණය කළ නොහැකි, ගැඹුරු, සුශික්ෂිත, ලයාන්විත වීම නිසා, ‘අනුන් ගහන් කත්වා’ වර්ගයේ ගායක පුස්සන්ට, ඔහුව ගසාකෑමට ඉඩක් නොලැබුණු බවයි. එමෙන්ම, ඔහු තම ගීත පිලිබඳ අයිතිය සම්බන්ධයෙන්, කල්තබාම අවශ්‍ය නෛතික පියවර ගෙන තිබුණු බවත්, මට මතකය.  සිනමා නළුවකු වීමට තරම් කඩවසම් පුරුෂයකු වූ ඔහු, කිසිවිටකත් ‘කොරන්ට බැරි මගුල් නොකර සිටීම’ නිසා, සිනමා නළුවකු නොවීය. අදනම් ඉන්නේ බහුකාර්ය කලාකරුවෝ නොවැ.

   ප්‍රේමය නමැති අති සුන්දර හැඟීම, අප හදවත් තුළ මෝදුවන කාලයේදී, මේ ප්‍රේම කුමාරයා, අපේ හදවත් වලට කෙඳිරූ පෙම්ගීත සමුච්ඡය, අප ගෙනගියේ පෙම්ලොවේ ඉහලම තලයක ඇති, ආත්මික සුවයක් කරා යයි කීමට නොපසුබට වෙමි. ඔහුගේ ගීත ලැයිස්තුවක් මෙතනට ඇතුළත් කිරීමට අදහස් නොකරමි. මේ රටේ බහුතරයක් ගීත ලෝලීන්ට මතක තිබෙන්නේ ඔහු ගැයූ, ‘මාගෙ පුතුට මල් යහන සදන්නේ’ නමැති ගීතයයි. නමුත් මෙය ‘පුංචි බබා‘ නමැති සිංහල චිත්‍රපටියේ, පසුබිම් ගායනයක් බවත්, එම චිත්‍රපටියේ පසුබිම් සංගීතය නිර්මාණය කළේ ද, සිසිර සේනාරත්න මහතා බව දන්නේ, ටිකදෙනෙකි. (දර්ශනයේ පෙනීසිටියේ ජෝ අබේවික්‍රම මහතායි)  සිසිර සේනාරත්න මහතා වෙනුවෙන් ඒ ගීතය මේ වනවිට මාධ්‍ය ඔස්සේ බහුලව ප්‍රචාරය වන බැවින්, සැබෑ ප්‍රේමය කුළුගැන්වෙන, පෙම් සුවඳ සැබැවින්ම විහිදෙන, ඔහුගේ වෙනත් පෙම් ගීයක් මෙහි ඇතුළත් කරමි.

   අපේ කාලයේ පෙම් සිහින මවාදුන් පෙම් කුමරාණෙනි, සැබෑ ගායකයකු යයි හදවතින්ම කිවහැකි, උතුම් පුරුෂයාණනි, ඔබට නිර්වාණ සම්පත්තිය අත්වේවා!

 

2015 පෙබරවාරි මස 05 වැනි දින 1011 පැය

Advertisements

Comments on: "අහෝ…! නිහඬවම නික්මුණිය ඔහු" (3)

  1. එතුමාට නිවන් සුව අත්වේවා

ප්‍රතිචාරයක් ලබාදෙන්න. විවේචනය කරන්න. සංවාදයට එළඹෙන්න. යෝජනා ඉදිරිපත් කරන්න.

Fill in your details below or click an icon to log in:

WordPress.com Logo

ඔබ අදහස් දක්වන්නේ ඔබේ WordPress.com ගිණුම හරහා ය. පිට වන්න / වෙනස් කරන්න )

Twitter picture

ඔබ අදහස් දක්වන්නේ ඔබේ Twitter ගිණුම හරහා ය. පිට වන්න / වෙනස් කරන්න )

Facebook photo

ඔබ අදහස් දක්වන්නේ ඔබේ Facebook ගිණුම හරහා ය. පිට වන්න / වෙනස් කරන්න )

Google+ photo

ඔබ අදහස් දක්වන්නේ ඔබේ Google+ ගිණුම හරහා ය. පිට වන්න / වෙනස් කරන්න )

%d bloggers like this: