අදට යෙදෙන අනගාරික ධර්මපාල තුමාගේ 150 වැනි ජන්ම දිනය නිමිත්තෙන් වෛද්‍ය රුවන් එම් ජයතුංග විසින් ලියා ඒවා තිබුණු ලිපියක් ඔබේ කියවීම සඳහා මෙසේ පළකරනවා.
අනගාරික ධර්මපාලතුමාගේ ජීවිතය කැපවන්නේ සමාජය යහපත් කිරීමේ අරමුණින් කරන ලද අරගල නිසාය. එසේම මේ අරගල හිංසනයෙන් සහ බලහත්කාරයන් තොර වීමත් අරගලය ස්වාර්ථය සඳහා යොදා නොගැනීමේ සාධකය නිසාත් කැපී පෙනෙයි.
ධර්මපාලතුමා සමාජ අසධාරනයන් අත් විඳින්නේ පාසල් කාලයේදීමය. වෙසක් දිනයේදී පාසල් නොගොස් ආගමික වතාවත් වල යෙදීම නිසා ඔහුව සාන්ත තෝමස් විද්‍යාලයෙන් නෙරපා දමයි. එය පාසල් දරුවෙකුගේ මූලික අයිතීන් උල්ලංඝනය කිරීමක් විය. අද දිනයේ දියුණු සංස්කෘතියක් පවත්නා සෑම රටකම සිසුන් ගේ ආගමික දින සඳහා නිවාඩු ලබා ගත හැක. මෙම මූලික ළමා අයිතිවාසිකම පිලිබඳව හැඟීම් සහ පාසල විසින් තමාට අසාධාරනයක් කල බව ළමා දොන් ඩේවිඩ් හේවාවිතාරණ වටහා ගනියි. නමුත් එකල සමාජයට , පාසල් පරිපාලකයන්ට සහ අධ්‍යාපනවේදීන්ට මෙම මූලික ළමා අයිතිවාසිකම පිලිබඳව වැටහීමක් නොවීය.
අනගාරික ධර්මපාල කොලඹ උසස් සහ ධනවත් ප්‍රභූ පවුලක සාමාජිකයෙකි. එම නිසා බටහිරට ලැදි කොලඹ උසස් සමාජය තුල ගැවසී එම සමාජයේ අඩුපාඩු දැකීමට ඔහුට හැකි විය. ඔහු අතිථී භීතිකාව (xenophobia ) හෙවත් විදේශිකයින්ට බිය සහ නුරුස්නා බව නිසා හෝ හීනතාමාන සංකීර්ණය නිසා හුදු බටහිර විරෝධියෙකු නොවුයේය. ඔහු බටහිර ශිෂ්ටාචාරයේ උසස් සහ දියුණු අංගයන් අධ්‍යනය කලේය. බටහිර ශිෂ්ටාචාරයේ දියුණුව රඳා පවතින අධ්‍යාපනික , තාක්‍ෂණික සහ සමාජ විනය ලංකාවේ ඇති කල යුතු බව විශ්වාස කලේය. විදේශයන් වෙත ගොස් කර්මාන්ත ඉගෙන ගැනීමට ඔහු තම වියදමින් ශිෂ්‍යත්ව පවා දුන්නේය. අනගාරික ධර්මපාලතුමා විරුද්ධ වූයේත් විවේචනය කලේත් බටහිර සංස්කෘතියේ දියුණු හරය වෙනුවට එහි පහළ ස්ථර වල ඇති කුණු කසළ වැළඳ ගැනීමෙන් සිය ජාතික අනන්‍යතාව ක්‍ෂය කර ගැනීම පිලිබඳවය.
අනගාරික ධර්මපාලතුමා ජාතිවාදියෙක් ද ? ඔහු ලියූ ඇතැම් කවි සහ ලිපි මගින් අන්‍ය ජාතිකයන් විවේචනය කල බව ඇතැමෙකු පවසති. ඔහුගේ බස අද කාලයට සාපේක්‍ෂව කර්කශ වූවද එම කාලයේ අධ්‍යාපනයෙන් අඩු ග්‍රාමීය ජනතාව ආමන්ත්‍රනය කිරීමේදී යොදා ගත් සාමාන්‍ය විවහාරයකි. අධ්‍යාපනයෙන් සහ සමාජ මට්ටමින් අඩු ජනතාවට ආමන්ත්‍රනය කිරීම සඳහා ඔහු සරල ග්‍රාම්‍ය භාෂාවක් යොදාගත්තේය. නමුත් අනගාරික ධර්මපාල ජාතීන් අතර විස පැතිරූ ස්වාර්ථය සඳහා ජාතීන් අතර විරසක ඇති කල නායකයෙකු නොවීය. ඇතැම් අවස්ථා වලදී දමිළ සහ මුස්ලිම් ජන වර්ගයන් තුල පොදුවේ තිබෙන ඇතැම් දියුණු ලක්‍ෂණ සිංහලයන් විසින් අනුගමනය කල යුතු බව ලිවීය. රැකියා කර්මාන්තයේ නොයෙදෙන යන්තම් ජීවත් වීම සඳහා කය සොලවන , අනාගතයක් මෙන්ම දුවා දරුවන් ගැන නොසිතන නූගත්කමේ ගැලී සිට මත් පැන් පානයේ යෙදෙන පුද්ගලයන් ඔහුගේ නිර්දය විවේචනයට ලක් විය.
ඔහු සිංහල පමණයි යන පටු අදූරදර්ශී ආත්මාර්ථකාමී සටන් පාඨය බැහැර කලේය. එමගින් සිංහල දරුවන් සදාකාලික ග්‍රාම්‍ය නූගත්වයේ සහ බාහිර ලෝකයට විවෘත විය නොහැකි කොදෙව් මානසිකත්වයේ සිරකරුවන් වන බව පසක් කලේය. ස්ව භාෂාව ප්‍රගුණ කොට විදේශ භාෂාද ඉගෙන ගත යුතු බව අනගාරික ධර්මපාලතුමා පෙන්වා දුන්නේය. දියුණු සමෘධිමත් තාක්‍ෂණයෙන් උසස් ආධ්‍යාත්මික ස්වයං විනයක් සහිත සමාජයක් පවතින ලංකාවක් පිලිඳව ඔහු සිහින දුටුවේය.
අනගාරික ධර්මපාලතුමා බුදු දහම ගැඹුරින් හැදෑරීය. 1893 දී චිකාගෝහි පැවති දෘෂ්ටි සම්මේලනයේදී එතුමා බුදුදහම පිලිබඳව හරවත් දේශනයක් කලේය. එසේම කර්නල් හෙන්රි ස්ටීල් ඕල්කට් වෙත , බ්ලැවට්ස්කි මැතිණිය වෙත , හවායි හි ෆෝස්ටර් මැතිණිය වෙත යැවූ ලිපි වල බුදු දහම මෙන්ම අන්‍ය ආගම් පිලිබඳව අනගාරික ධර්මපාලතුමා සතුව පැවති විචක්‍ෂණ අනුභූතිය පෙනී යයි. බෞද්ධ අයිතිවාසිකම් ස්ථාපිත කොට බුද්ධගයාව බෞද්ධයන් සතු කර ගැනීමේ මහා ක්‍රියාදාමය පසුපස සිටියේ අනගාරික ධර්මපාලතුමාය.
අනගාරික ධර්මපාලතුමා තද විවේචකයෙකි. ඔහු සත්‍ය දුටු තැන එය පෙන්වා දුන්නේය. මහත්මා ගාන්ධි පවා අනගාරික ධර්මපාලතුමාගේ විවේචන වලට ලක් විය. මේ නිසා ඇතැමෙකු අනගාරික ධර්මපාලතුමා අන්තවාදියෙකු ලෙස හඳුන්වා දෙමින් එතුමාගේ සමාජ විප්ලවය අඩපණ කිරීමට කටයුතු කලෝය. මේ හේතුන් නිසා අවසාන සමයේදී කළකිරීමට පත් වූ එතුමා යළි ලංකාවට නොපැමිනෙන බවට ශපථ කලේය.
අනගාරික ධර්මපාලතුමා විසින් ආරඹ්හ කරන ලද සමාජ සංකෘතික විප්ලවයේ අග්‍ර එල නෙලා ගත්තේ ආත්මර්ථකාමී දේශපාලකයන් විසිනි. දියුණු සමෘධිමත් තාක්‍ෂණයෙන් උසස් ආධ්‍යාත්මික ස්වයං විනයක් සහිත සමාජයක් පවතින ලංකාවක් බිහි කිරීමේ අනගාරික ධර්මපාලතුමා ගේ සිහිනය ඔවුන් විසින් පැහැර ගත්හ. ඒ වෙනුවට ජාතීන් ඇනකොටා ගන්නා සමාජ පසුගාමීත්වයෙන් සපිරි, විනයක් නොමැති ලංකාවක් ඔවුන් නිර්මාණය කලහ.
අනගාරික ධර්මපාලතුමාට කල හැකි උසස්ම බහුමානය වන්නේ වාර්ෂිකව එතුමාගේ පිළිරුවට මල් මාළා පැලඳවීම හෝ ගුණකථන පැවැත්වීම නොව එතුමා දුටු සිහිනය සැබෑ කරවීම සඳහා පියවර ගැනීමයි.
වෛද්‍ය රුවන් එම් ජයතුංග
![my-signature-for-blog[1]](https://jangun.wordpress.com/wp-content/uploads/2014/07/my-signature-for-blog1.jpg?w=540)
2014 සැප්තැම්බර් මස 17 දින 1110 පැය
jangun.wordpress.com 
Comments on: "අනගාරික ධර්මපාලතුමාගේ සමාජ සංස්කෘතික විප්ලවය" (8)
[…] […]
” අනගාරික ධර්මපාලතුමා විසින් ආරඹ්හ කරන ලද සමාජ සංකෘතික විප්ලවයේ අග්‍ර එල නෙලා ගත්තේ ආත්මර්ථකාමී දේශපාලකයන් විසිනි. දියුණු සමෘධිමත් තාක්‍ෂණයෙන් උසස් ආධ්‍යාත්මික ස්වයං විනයක් සහිත සමාජයක් පවතින ලංකාවක් බිහි කිරීමේ අනගාරික ධර්මපාලතුමා ගේ සිහිනය ඔවුන් විසින් පැහැර ගත්හ. ඒ වෙනුවට ජාතීන් ඇනකොටා ගන්නා සමාජ පසුගාමීත්වයෙන් සපිරි, විනයක් නොමැති ලංකාවක් ඔවුන් නිර්මාණය කලහ”
මේ ටික නම් තාමත් අපූරුවට එන එන අය කරගෙන යනවා. බුදුහාමුදුරුවොත් විකුණන් කන උන්ට මෙතුමා විකිණීම කජ්ජක්ද ?
සම්පූර්ණයෙන් එකඟ වෙනවා. අපේ දේශපාලුවෝ විකුණාගෙන නොකන්නේ මොකක්ද?
අනගාරික ධර්මපාලතුමාගේ චරිතයෙන් ගන්න පුළුවන් ආදර්ශ ගොඩක් තියනවා. එතුමා නියම දේශප්‍රේමියෙක්.
තාමත් තරුණ පිරිස් වලට මේ ජාතික සහ ආගමික අන්තවාදී සිතිවිලි වලින් මිදීමට මෙම ශේෂ්ඨ චරිතය ආදර්ශයට ගන්න පුළුවන්. අවි බලයට වඩා වචනවල බලය වැදගත් බව අනගාරික ධර්මපාලතුමා එතුමාගේ දේශන හරහා වෙනත් ප්‍රබල චරිත වන කර්නල් හෙන්රි ස්ටීල් ඕල්කට් මහතා , බ්ලැවට්ස්කි මැතිණිය , හවායි හි ෆෝස්ටර් මැතිණිය ආදී පිරිස් තමා හා එක් කරගැනීමෙන් ඔප්පු කර තිබෙනවා.
ලෝකයේ ජාතිය සහ රට කුමක් වුවත්, රටක සහ තමන්ගේ දියුණුව හා සාර්ථකත්වය සදහා ගතහැකි යහපත් යම් දෙයක් තිබේ නම් ඒ දෙය තමන්ගේ සහ රටේ දියුණුව වෙනුවෙන් එක කරගැනීම ඉතා වැදගත් දෙයක්.
එතුමා දැකපු ඒ සිහිනය අද වෙන කොට දේශපාලන නියෝජිතයින් සහ වෙනත් අන්තවාදීන්(බෞද්ධ සහ අන්‍යාගමික) විසින් තම තමන්ගේ පෞද්ගලික අරමුණු ඉෂ්ට කරගැනීමේ චේතනාවෙන් විකෘති කරලා ඉවරයි.
එසේ නොමැතිව දුපත් මානසිකත්වයක හිරවී ආගම්වාදී සහ ජාතිවාදී හැගීම් වලින් මනස විකෘති කරගෙන සිටින තාක් කල් මේ රටට අනගාරික ධර්මපාලතුමා දුටු සිහිනය කරා යාමට නොහැකි වන අතර ඒසේ දුපත් මානසිකත්වයක හිරවී ආගම්වාදී සහ ජාතිවාදී හැගීම් වලින් මනස විකෘති කරගෙන සිටීම තුලින් තමන්ගේ පෞද්ගලික අරමුණු ඉටුකරගැනීමට යම් යම් බොරු දේශප්‍රේමීන්ට නම් හැකි වනු ඇත.
අනගාරික ධර්මපාල තුමා ජාතිවාදියෙක් කියලා හංවඩු ගහන්න හදන ජාතිවාදී වැද්දන් පිරිසක් අදත් ඉන්නවා. එතුමාගේ දර්ශනය තේරුම් නොගත්ත අය තමයි සියල්ල දත් ආකාරයෙන් හැසිරෙන්නේ. එතුමාගේ දර්ශනය පාසල් පොත්වලට ඇතුළු කිරීම වළක්වන්නේ නියම ජාතිවාදියෝ.
අනගාරික ධර්මපාල ශ්‍රීමතානන්ගේ චරිතය ඇසුරින් චිත්‍රපටයකුත් නිකුත් වෙලා නේද…කිරම විමල ජෝති හාමුදුරුවො නිෂ්පාදනය කරපු බවක් තමයි මට අහන්න ලැබුනෙ.
ඔව් සිරා මම දැක්කා කටවුට් එකකුත්. වෙලාවක් ලැබුණ ගමන් බලන්න ඕනෙ.
//එතුමාගේ දර්ශනය තේරුම් නොගත්ත අය තමයි සියල්ල දත් ආකාරයෙන් හැසිරෙන්නේ.// මතුපිටින් දැක එකවරම නිගමන අරගෙන ප්‍රකාශ නිකුත් කිරීම කටයුතු කිරීම තවමත් බොහෝ අයතුළ දක්නට ලැබෙන දුබලතාවක්. වෛද්‍ය රුවන් එම් ජයතුගංයන් මේ චරිතය විනිද යමින් එහි ගැඹුරට කිමිදෙන්නට ගත් වටිනා වෑයමකි.